Ваш браузер устарел. Рекомендуем обновить его до последней версии.
ГОРЯЧАЯ ЛИНИЯ ЕГЭ, ОГЭ

телефон доверия: 

8-(4112)-42-10-28

 +7(495)104-68-38

 

"ГОРЯЧАЯ ЛИНИЯ":

ЕГЭ: 8-(4112)-42-10-46

 ОГЭ: 8-(4112)-42-10-48

 +7(495)984-89-19

Наши будни


 

Оскуола кунэ

Бу дьыл, сэтинньи 20 күнүгэр Иван Васильевич Яковлев аатынан Үгүлээт орто оскуолата төрүттэммитэ 99 сааһын бэлиэтиир үөрүүлээх тэрээһин буолан ааста.

 

Бу күн оскуолаҕа «аһаҕас аан” буолла. Сарсыарда 8.30 чаастан төрөппүттэр, ыалдьыттар регистрациялара саҕаланна. 9.00 чаастан аһаҕас уруоктар буоллулар. Барыта 44 аһаҕас уруок ыытылынна. Хас биирдии учуутал уруогар Иван Васильевич Яковлев аатын, ону таһынан оскуола төрүттэммит устуоруйатын сырдаттылар. Үгүс төрөппүт, ыалдьыт-сылдьыбыт уруоктарыттан астынан, сорохтор билбэтэхтэрин билэн-көрөн, дуоһуйан тарҕастылар.

 

Эбиэт кэннэ 15:00 чаастан Иван Васильевич Яковлевка аналлаах истиэндэ үөрүүлээх быһыыга-майгыга арылынна. Манна, Саха Республикатын үөрэҕэриитин туйгуна, “Знанием победишь” бэлиэ хаһаайына, Иван Васильевич Яковлев аатынан Үгүлээт орто оскуолатын дириэктэрэ Ксенофонтова Любовь Алексеевна-1920 сыллаахха Үгүлээт нэһилиэгэр маҥнайгы оскуола арыллыбытын, онно Иван Васильевич Яковлев уон сэттэ үөрэнээччиттэн биирдэстэрэ буолбутун туһунан уонна кини олоҕун, үлэтин кэнчээри ыччакка, ыалдьыттарга анаан кэпсээтэ.

 

Үгүлээт нэһилиэгин муниципиальнай тэриллии баһылыга Октябрь Иванович Лукин үөрүүбүтүн тэҥҥэ үллэстэн туран, оскуола төрүттэммитэ 99 сылынан 10.000 сертификат туттарда. Ону таһынан “Сүбэ” оҕо  түмсүүтүн бэрэсидьиэнигэр эҕэрдэ сурук уонна Үгүлээт  нэһилиэгин туһунан өйдөбүнньүк бэлиэ бэлэхтээтэ.

 

Иван Васильевич төрөппүт кыыһа, педагогическай үлэ бэтэрээнэ, Саха Республикатын үөрэҕэриитин туйгуна, учууталлар учууталлара Яковлева Римма Ивановна олус долгуйан, үөрэн туран, бүгүҥҥү үөрүүлээх күнүнэн барыларын эҕэрдэлээн тыл эттэ.

 

Дьэ,бу кэннэ тэрээһиммит үөрүүлээх түгэнэ тиийэн кэллэ. Ол курдук, Иван Васильевич Яковлев истиэндэтин аалай кыһыл лиэнтэтин кырыйалларыгар чиэс бэрилиннэ: Үгүлээт орто оскуолатын дириэктэригэр Ксенофонтова Любовь Ал

ексеевнаҕа, кыыһыгар Яковлева Римма Ивановнаҕа уонна Үгүлээт нэһилиэгин баһылыгар Лукин Октябрь Ивановичка. Истиэндэ арыллыбытын туоһулаан улуустааҕы, регионнааҕы научнай практическай конференция кыайыылааҕа, 11 кылаас үөрэнээччитэ Яковлева Наташа “Уһулуччу учуутал, токседермист, айылҕаттан талааннаах уруһуйдьут” диэн дакылаатын иһитиннэрдэ. Дакылаат кэннэ араас саастаах оҕолор литературнай туруорууларын көрдүбүт, иһиттибит.

 

16.00 чаастан «Сүбэ» оҕо тэрилтэтин иһинэн ыытыллар “Күбэйиндэ кэскилэ” диэн общественнай хамсааһын, пионерскай хаамыытын кылаастарынан көрдүбүт. Знамя, горн, барабан тутуурдаах урукку кэм пионердара үөрүүлээх тэрээһиммитин арыйдылар. Ону таһынан  араас сылларга пионердыы сылдьыбыт ынырыылаах ыалдьыттарбыт Олег Кошевой этэрээтэ буолан, пионерга киирбиттэрин бэлиэтиир андаҕары этэн, речевка, ырыа ыллаан оҕолорго холобур буоллулар. Ол кэннэ, хас биирдии кылаас хамандыыра «Сүбэ» оҕо тэрилтэтин биризидьиэнигэр Богдан Николаевка рапорт биэрэн, кылааһынан речевка, ырыа ыллаан иһитиннэрдилэр.  “Күбэйиндэ кэскилэ” диэн общественнай хамсааһын тэрээһинин, оскуола төрөөбүт күнүгэр анаан оҥоһуллубут минньигэс туордун сиэн түмүктээтибит.

 

Киэһэ 18.00 чаастан «Ойор күннээх оҕо саас» диэн “икки сулус” ырыа күрэһэ буолан ааста. Бу киэһэ оскуолаҕа, учууталга сүгүрүйэн элбэх ырыа ылланна. Барыта 12 икки “сулуһу” истэн дуоһуйа сынньанныбыт. «Икки сулус» муҥутуур кыайыылаахтарынан 9 кылаас үөрэнээччилэрэ: Соня Сидорова уонна Миша Алексеев буоллулар. Көрөөччү биһирэбилин 11 кылаас үөрэнээччитэ Айтал Афанасьев уонна 10 кылаас үөрэнээччитэ Ваня Хачанов ылан ыллылар. Атын кыттааччылар лауреат, дипломант үрдүк аатын сүктүлэр.

 

Бу курдук, оскуолабыт төрөөбүт күнэ өрө күүрүүлээхтик, үрдүк таһымнаахтык ааста.